Atzo gauzatu zuen Jesus Mari Santos alkateak dimisio ofiziala, eta horren harira, balorazioa egin du EH Bildu udal taldeak, Kronikara bidalitako prentsa-ohar bitartez.
Bertan, ezer baino lehen EH Bilduk «onena opa dio urte eta erdi honetan Astigarragako Alkatea izan den Jesus Mari Santosi». Dena den, albisteak ez die harritu: «EH Bilduren aurreikuspenetan zegoen Alkateak legealdia ez amaitzea, eta hasieratik erdi itzalean agintzen egon den Alkateordea izan den Zorione Etxezarragak aginte-makila hartzea. Beraz, zoritxarrez, aulki-joko honek ez ditu gauzak gehiegi aldatuko».
«Balantze negatiboa»
Ordura arte, Gobernu honen «balantze negatiboa» egiten du EH Bilduk, eta dio «alferrik galdutako urte eta erdia izan dela»; besteak beste, «A3 autobus linea ezabatu digute; ordainetan, astigartar guztiok, sagardotegietara doazen luxuzko garraio zerbitzua ordaindu dugu; urteetan aurreneko aldiz ez da Mugikortasun astea antolatu, eta taxi zerbitzua oraindik ere desagertua dabil; Kultur Etxearen proiektu estrategikoaren diseinuan herritarren eta eragileen parte-hartzea baztertu da; Haurreskola berria martxan jartzeko eragozpenak eta trabak nabarmenak izan dira; hondakin-bilketa pribatizatu egin da eta langileak kaleratu dira inolako konplexurik gabe...».
Horregatik guztiagatik, eta beste hainbat arrazoi medio, EH Bilduk ezin du esan «2015eko ekainetik bizitakoa ona izan denik»: «inprobisazioa, koordinazio falta, gezurrak eta utzikeria nagusi izan diren 580 egun izan dira». Gainera, uste dute «EAJk, PSE-EEko zinegotzia ezinbesteko konplizea izan duela». Eta beraz, «egindako guztiaren ardura ere baduela».
Bukatzeko salaketa ere egiten du: «osasun arazoak dimisiorako arrazoi nagusia izan direla onartuta ere, EAJko gainontzeko kideek, zinegotziek zein militante jakin batzuk, Alkatearen aurka egin duten kanpaina salatu nahi dugu eta gure elkartasuna adierazi».