Joan den larunbatean jokatu zen, Arkaleko tiro zelaian, Txantxangorri elkarteko Tiro Txapelketa. Eta denetan onena, Urtzi Oiarbide izan zen, ia plater guztiak jota.
Compack sporting modalitatean jokatu zen txapelketa; kantxako ehiza ibilbideen modalitatean, alegia. Eta goizeko 09:00etan hasita, «goiz eguzkitsu bezain hotzean, zero azpitik hiru gradurekin», 23 tiralarik hartu zuten parte, iaz baino bost gehiagok: «tartean zeuden, belaunaldi berrietako partehartzaileak», elkartetik azaldu dutenez.
Plater bakarreko aldea, aurreneko sailkatuen artean
Serie bakarrera jokatu zuten txapelketa: 25 plater, traiektoria ezberdin eta konbinatuekin. Txapeldun izateko, 23 plater jo behar izan zituen Urtzi Oiarbidek, bi bakarrik huts eginda. Izan ere, plater bakarreko aldearekin nagusitu zen: 22 jo zituen Jesus Arrietak.
Hirugarren sailkatu zen Laxaro Oiarbide, 20 plater jota; eta plater berdinekin laugarren izan zen Manu Loinaz. Bosgarren, Oscar Redondo izan zen, 18rekin.
Sari banaketa eta luntxa, eguerdian elkartean
Txapelketa bukatuta, elkartera mugitu ziren denak, eguerdi partean. Bertan banatu zituzten sariak, eta luntxa ere eskaini zieten bertaratuei.