Proiektu berri bat jarriko dute martxan, Beterri-Buruntzaldeako Udalek, Oarsoaldea eta Debagoiena eskualdeekin batera. Izan ere, hiru eskualdeetan burutuko da, KoopFabrika izeneko proiektua, tokian tokiko instituzio eta eragile lokalen inplikazioarekin.
Helburua izango da, ekintzailetzari eduki sozial, kooperatibo eta eraldatzailea ematea, «tokian tokiko sareen garrantzia abiapuntu hartuta».
Izenemateak eta informazio gehiago, webgunean
Otsailaren 1ean jarriko da martxan proiektua, eta parte hartzea doakoa da, baina plazak mugatuak dira. Dagoeneko zabalik dago izena emateko epea, eta horretarako, eta baita informazio gehiagorako ere, webgunea jarri dute martxan: koopfabrika.eus. Sare sozialetan ere emango dute, programaren berri.
Deia luzatu diete, elkarlanean proiektu bat garatu nahi duten pertsona, talde edo enpresei.
Antolatzaileek, deia luzatu diete «Beterri-Buruntzan proiektu bat elkarlanean garatu nahi duten pertsona, talde edo enpresei». Zehazki, hiru perfiletako jendeari zuzenduta dago programa: proiektu edo ideiaren bat lantzen edo martxan jarri nahian dabiltzanak; orain arte elkarte gisa aritu arren, profesionalizatu edo beste era batera antolatu nahi duten taldeak; eta enpresen baitako barne-ekintzailetza proiektuei dimentsio sozialetik ekiteko asmoa dutenak.
«Formakuntzan, arlo teoriko komuna lantzeaz gain, ekintzailetza sozialerako tresnen erabilpenean trebatu, martxan diren egitasmoei bisitak egin, eta KoopFabrikatik irtendako proiektuei tutoretza eskainiko zaie, garapen eta saretzerako», azaldu dute.