Paco Etxeberriak eta Aranzadi zientzia elkarteak aurreneko kupela irekitzean, hasiko da Hernanin «sagardo berria dastatzeko garai maitatua», Koro Etxeberria kultura zinegotziak adierazi zuen bezala. Larunbat honetan izango da txotx irekiera, eta atzo aurkeztu zuten, udaletxean, Etxeberriak berak, Gurutze Amigorena turismo teknikariak, Jon Peña sagardogileak eta Alberto Blanco Kaxko elkarteko kideak.
Goizeko 11:30etan hasiko da inaugurazio festa, larunbatean, herri kirol erakustaldiarekin, Plazan. Gero, trikitilariak eta Kalez Kale Kantarikoak ibiliko dira Kaxkoan, txalapartariek txotxera deitu arte. 13:00etan omenduko dute Aranzadi elkartea: «aspalditik izan du lotura haundia Hernanirekin, oroimen historikoaren edota toponimiaren inguruko lanak eginda. Eta ibilbide luze hori eskertu nahi dugu», nabarmendu zuten.
Aurreneko kupela irekita, herritarrek aukera izango dute sagardo berria dastatzeko, eta pintxoak ere izango dira. Eta ondoren, aurreneko bazkaria egingo dute Akarregin.
Hortik aurrera, makina bat ekintza izango dira denboraldian: Euskal balezaleen triskantza dokumentala, Sagar Lasterra, Sagar Martxa...
Eraso sexisten kontrako deia, Udalak eta Kaxko elkarteak
Eta garai honetarako, dei berezia egin zieten herritarrei, Kaxko elkarteak eta Udalak, eraso sexisten kontra, eta kale garbien alde. Zentzu horretan, nabarmendu zuten haunditu egingo dela udaltzain, kale garbitzaile eta komun kopurua. Eta haunditu egingo da, urtero bezala, garraio zerbitzua: autobusak eta taxiak.