SAGARDO Berriaren Eguna ospatzeko zita dute gaur astigartarrek. Sagardo berriaren ezaugarriak 12:00etan emango dira kultur etxean, eta Eneko Atxak sagarrondoa landatuko du ondoren. Txotx denboraldi hasiera Zapianen egingo da eguerdian, eta bertan irekiko du aurreneko kupela Eneko Atxak.
Aurtengo berrikuntza berriz, arratsaldean izango da, eta hala gogorarazi du Udalak prentsa ohar bidez: «aurtengo irekierak herritar guztiei zuzendutako berrikuntzak izango ditu, gobernu taldearen ekimenari esker. Orain arte irekiera erakundeei soilik zegoen bideratua, eta gure ustez herritar bakoitza da garrantzitsua sagardoaren kulturaren transmisioan eta sustapenean». Txotx Berri Herrikoia ospatuko da gaur beraz, Murgia Jauregian, Astigarragako sagardotegi eta sagardogile ezberdinekin. 18:30etan izango da aurreneko ekitaldia: bakailu tortilla prestatzen ikasteko tailerra. Familian hartu daiteke parte eta aurrez izena eman behar da: 943 55 05 75 edo info@sagardoarenlurraldea.com. Ondoren, 19:30etatik 21:30etara sagardo eta pintxo dastaketa antolatu dituzte.