Hitzaldia antolatu dute etzi, ostegunean, Dobera Euskara Elkarteak eta Nabarraldek: Iruña-Veleia, zertan da?, Juan Martin Elexpuru filologoaren eskutik. Arratsaldeko 19:00etan izango da, Biteri kultur etxeko areto nagusian. Tomas Elortzak gidatuko du saioa.
Hitzaldian, Elexpuru ariko da Iruña-Veleia aztarnategiari buruz, eta bertan egindako aurkikuntzei buruz. Iruña Oka herrian dago kokatuta aztarnategia, Gasteiztik 10 kilometro ingurura. Ikerketa bat dauka egina Elexpuruk: Iruña-Veleiako euskarazko grafitoak. Izan ere, erromatarren garaiko euskerazko grafitoak eta ostrakak aurkitu zituzten han, baina faltsutzat jo zituzten gero, eta gaia epaitegietan dago orain. Elexpuruk berak, beste hainbatekin, SOS Iruña Veleia elkartea sortu zuen, grafito eta ostraka haiek egiazkoak izan zitezkeela sinistuta.
Elexpururi galderak egiteko ere izango da aukera, saioan.
Ostraken erakusketa, bertan
Gainera, ostraken erakusketa ere jarriko dute ikusgai, Biterin bertan, hitzaldiaren aurretik eta ondoren.