Urriaren 19an aurkeztu zuten Inurritegia, Ernaiko II. Prozesu Kongresua: «Gazte Antolakundea sortu genuenetik lau urte pasa direnean, momentuak eskatzen dituen eztabaida, hausnarketa eta erabakiak hartzeko aurrera eramango duguna», azaldu du Ernaik.
Eta nabarmendu du: «azken urteotan egindakoaren uzta jaso, akatsak zuzendu eta aurrera begiratzeko ordua da. Nora goazen jakinda, gure ekinbidea egonkortu, indartu eta birdefinituko dugu».
Eta lan hori, Euskal Herriko eta Hernaniko gazteekin egin nahi dute: «horregatik, Ernairen Kongresuan edonork izango ditu ateak irekita». Orain, eztabaida fasean sartzera doaz.
Aurkezpena Garinen, bihar
Horri buruzko nondik norako guztiak azaltzeko, prozesuaren aurkezpena egingo dute bihar, 19:00etan Garinen. Kongresuaren ezaugarriak azaldu, eta izena emateko aukera ere eskainiko dute: «abian da Inurritegia, eguneroko borrokan eraikia. Oinak beti lokatzetan, Inurritegian ikusiko dugu elkar».