Abiadura bizian joan ziren atzo, Madrilgo Ciudad Universitariako zelaian, Hernani eta Cisnerosen arteko norgehiagokako aurreneko 30 minutuak. Cisnerosek hartu zuen aurrea markagailuan, bi entsegu eta hauen transformazioarekin; 14-0. Baina hurrengo 15 minutuetan bizi-bizi ibili zen Hernani, eta hortzak ederki zorroztuta, koska ederra egin zion markagailuak erakusten zuen aldeari.
Mikel Imazek, Mikel Bidegaraik, eta Pello Perezek egin zuten entsegu bana, eta Elosegik transformatu zituen bi. Tarte horretan Cisnerosek ere lortu zituen puntu batzuk, eta 31garren minutuan, 21 eta 19, aldea txikia zen markagailuan.
Hortik aurrera, ordea, indarrik gabe geratu zen Hernani, akituta. Ordura arteko hiru entseguei beste hiru gehitu zizkion Cisnerosek atsedenaldirako, eta bigarren zatian, ezinean zebilen Hernani baten aurrean, beste bi egin zituen, partidua eta bonusa irabaziz; 50 (b)-19.