Oso kontu garrantzitsuak izan zituen asteazkeneko ezohiko plenoak, Astigarragako Udalean. Eta aurrenekoa, gainera, ezarritako gai ordenarekin hasi aurretik eman zuten: dimisioa aurkeztuko du Jesus Mari Santos alkateak, osasun arazoengatik. Hala jakinarazi zuen Zorione Etxezarraga alkateordeak; Santos bera ez zen egon plenoan, ingresatuta baitzegoen asteazkenean.
Behin plenoa hasita, aho batez onartu zuten Zarkumendegira doan bidegorriaren obren likidazioa.
Eta onartu zuten, baita ere, 2016ko aurrekontuan kreditu gehigarri bat sortzea, gastu ezberdinetara bideratuta. Hala ere, desadostasun batzuk izan ziren, eta Andoni Gartzia EH Bilduko bozeramaileak eskatu zuen, azpipuntu bakoitza banaka bozkatzea: aho batez onartu ziren aurreneko hiruak, eta kontra bozkatu zuen EH Bilduk, beste bietan. «Eskatu genuen diru bat bideratzea Haurreskolako obretara, remanentean utzi beharrean, baina ez da sartu», azaldu zuen Gartziak.
Ia zortzi milioiko aurrekontua, 2017an
2017ko Udal Aurrekontuak eztabaidatu eta bozkatu zituzten jarraian. Jon Arregi ogasun zinegotziak azaldu zuen, bertan jaso dituztela, EH Bilduk eta PSE-EEk egindako aportazioak, «aurrekontu proposamena osatzen zutenak». Guztira, 7.996.985,87 eurokoa izango da aurrekontua, eta horietatik, milioi bat pasatxo izango da inbertsioetarako.
Andoni Gartziak salatu zuen «aurrekontuen sinesgarritasun eza, ikusita 2016rako aurreikusita zeuden inbertsio asko ez direla egin, edo gastu txikiagoa egin dela horietan. Beraz, ez daukagu oinarririk sinisteko 2017ko hauek egingo direla». Modu berean, nabarmendu zuen, emendakin batzuk onartu arren, «pisu haundiko beste batzuk kanpoan utzi» direla, eta kritikatu zuen, plenoan bertan jaso zutela aurrekontu definitiboaren laburpen taula: «ez dugu ulertzen nola onartu ditzakegun aurrekontuak orain, oraindik esku artean ez dauzkagunean. Korrika eta presaka onartu nahi izan dituzue». Horregatik, bere botoa zatitu zuen EH Bilduk: kontrako bost boto, eta abstentzio bat, saritzeko Gobernu Taldearen saiakera, emendakin batzuk onartzeko.
Beraz, aldeko sei botorekin (EAJren bost eta PSE-EEren bat), abstentzio batekin eta kontrako bost botorekin onartu ziren aurrekontuak.
Etxezarragak nabarmendu zuen, «oinarrizko partida eta inbertsioak jasota daudela aurrekontuan, garrantzitsuenak direnak. Eta indar berezia egin dugu merkataritzaren eta turismoaren alorretan». Eta adierazi zuen, beste alderdien emendakinetan, ez dutela zuzenketarik ikusi, hutsune berezi bat betetzeko: «beraz, uste dugu aurrekontua sendoa dela, eta arlo desberdinak jorratzen dituela».
Gartziak azaldu zuen, aurrekontuak ez daukala oinarri argirik, eta erronka nagusiak, aurreko legegintzalditik datozenak direla.
Tokiko garapenerako, hitzarmena onartuta
Aurrekontuen ondoren, eztabaidatu zuten Buruntzaldeako sei Udalen arteko lankidetza hitzarmena, tokiko garapena, sustapen ekonomikoa eta enplegua sustatzeko ekimen eta programak abiatzeko, garapen agentzia martxan jarri bitartean. Lau urterako hitzarmena da, eta 2017an, 62.600 euroko aportazioa egingo du Astigarragako Udalak; sei Udalen artean, 687.000 euro.
Andoni Gartziak azaldu zuen, EH Bilduk beti bultzatu duela agentziaren sorrera, eta honek jarraipena ematen diola, aurreko legealdian egindako lanari. Baina ez daude ados, Udalaren ordezkariak EAJ eta PSE-EEko zinegotzi bana izatearekin, ez duelako islatzen herriaren errealitatea: «EAJ eta EH Bilduko zinegotzi banak behar lukete ordezkariak». Beraz, aho batez onartu zuten hitzarmena bera; baina aldiz, EH Bilduren kontrako botoarekin, ordezkarien izendapena.
Lau mozioak, onartuta
Mozioei heldu zieten segidan, eta aho batez onartu ziren elikagai bankuaren aldekoa, guraso bakarreko familien eskubideen aldekoa, eta Euskadiko Polio Elkartearena.
EH Bilduk aurkeztutakoa ere onartu zen, eskatuz EAEtik guztiz erretiratzea Espainiako polizia. Baina abstenitu egin zen EAJ; eta PSE-EEk kontra bozkatu zuen: «garrantzitsua da Guardia Zibilaren eginkizuna», argudiatu zuen Mikel Duranek.
Bukatzeko, galderen puntuan, Gartziak kritikatu zuen Inuxente lasterketa ez egin izana; eta hondakinen gaia ere atera zuen: «zaborra pilatu da edukiontzien kanpoaldean. Horrek esan nahi du sistema zikina dela? Atez atekoarekin gertatu zenean, hori esan zenuten». Eta bestetik, galdetu zuen zergatik ez den jarri oraindik martxan organikoarena. Etxezarragak azaldu zuen, txipa programatzen duen enpresarekin izan dutela arazoa, eta urtarrila bukaerarako egongo dela martxan.