Gau magikoa pasata, merezitakoa jaso dute hernaniarrek, txukun eta garbi prest utzitako oinetakoen artean; Errege Magoek ez baitute sekula, hutsik egiten.
Opariak bakarrik ez, magia eta ilusioa ere zabaldu dituzte etxez etxe. Eskatutako ia guztia jaso dute batzuek; ezustez betetako opariak ireki dituzte beste batzuek, baina seguru den-denak pozik geratu direla.
Kalez kale, etxeetara joan aurretik
Errege Magoak atzo iritsi ziren Hernanira, eta kale buelta ederra egin zuten, etxez etxe lanean hasi aurretik.
Hasteko, Zaharren Egoitzara egin zuten bisita, eta ondoren, karrozara igo eta herritar guztiak agurtu zituzten, Musika Bandak eta txistulariek Erregeak zetozela iragartzen zutela.
Kale buelta bukatuta, udaletxeko arkupetan egin zieten harrera hernaniarrei, eta azken eskarien zerrenda osatu zuten.
Datorren urtera arte
Behin lanak bukatuta, etxerako bidea hartu dute goizaldean goiz hiru Errege Magoek. Baina aurretik, ohar bat eman nahi izan diete hernaniarrei: «segi beti bezain jator!».