Iristear da txotx denboraldi berria; hilaren 14an irekiko da Hernaniko sagardo denboraldia, eta, dagoeneko, Turismo Sailak jakinarazi du nork izango duen aurreneko tragoa egiteko ohorea: Paco Etxeberria antropologo eta mediku forentseak, eta hark zuzentzen duen Aranzadi zientzia elkarteak.
Hernaniko kideak, tartean
Etxeberriarekin batera etorriko dira Hernanira Juan Arizaga, Ornitologia Saileko zuzendaria; Paul Minguez, astronomia sailekoa; Fermin Leizaola etnografoa; Mari Jose Iriarte arkeologoa; eta Jose Angel Irigarai mediku eta euskaltzaina. Baliteke hernaniarren bat ere tartean izatea, baina oraindik ez dute datu gehiagorik eman nahi izan.
Herri-kirolak, berrikuntza
Irekiera ekitaldia eguerdiko 13:00etan izango da, eta bertan dastatuko dute gonbidatuek, herriko zuku preziatua. Aurretik, ordea, izango da zerekin gozatu; 11:30etan hasita, herri-kirolak izango dira.