Urte berri egunarekin batera, igandean egin zuten gaueko guardien farmazia aldaketa. Elkano kaleko Echeveste farmazian egingo dira aurtengo guardiak, eta duela hamar bat urtetik hona egiten duten bezala, Marian Arbaizar, Mar Santamaria eta Yolanda Caro arduratuko dira horietaz.
Ohi bezala, gaueko 22:00etatik goizeko 09:00etara iraungo dute gaueko guardiek. Beste urte batez, Hernani, Astigarraga eta Urnietako herritarrei emango diete zerbitzua.
«Batean bukatu, eta bestean hasten gara»
Aldaketa erraza dela onartzen dute Arbaizar, Santamaria eta Carok: «batean bukatu, eta bestean hasten gara. Erraz moldatzen gara. Normalean, egun batean gauzak non dauden begiratzea; medikamentuak aurkitzea erraza da, parafarmaziako gauzak aldatzen dira, normalean. Batzuetan, programa informatikoa aldatzen da, eta berriz ere, gogorarazi behar dugu». Dena den, diote dagoeneko farmazia guztietan izan direla, eta horrek laguntzen diela.
«Orokorrean, ospitaleko edo anbulategiko errezetekin etortzen da jendea»
Denetarik eskatu izan diete gauetako hiru botikariei, baina diotenez, «orokorrean, ospitaleko edo anbulategiko errezetekin etortzen da jendea». Gainera, azaldu dute askotan etortzen direla herritarrak eguneroko gauzen bila, batez ere, haurrentzako papilak, esneak eta txupeteak; antisorgailuak; aho bidezko sueroak; zorrien aurkako botikak... Horrez gain, «urtaroaren araberako gaitzen aurkako botikak erostera ere etortzen dira: gripearen aurkakoak, alergien kontrakoak...».
Anekdotak ere, ez dira falta
Urte hauetan hainbat bitxikeri ere bizi izan dituzte Marian Arbaizar, Mar Santamaria eta Yolanda Carok. Horietako batzuk kontatu daitezkeela diote, beste batzuk, ordea, ez: «behin batek esparatrapua eskatu zigun izorratutako zapata lotu eta parrandarekin jarraitzeko; eta beste batek, taxiari deitzeko eskatu zigun, mobilean saldorik ez zuelako...».