Orain Hernani udal taldeak 1.000 euroko laguntza ekonomikoa eman dio Pasaportes para Siria elkarteari. Jaione Aristregi, Orain Hernaniko ordezkariak azaldu bezala, «gerratik ihes egin dutenek bizitza duina izan dezaten laguntzeko apustua» egin nahi izan du.
Elkarteak azaldutakoaren arabera, «Orain Hernanik emandako 1.000 euroak oso-osorik erabiliko dira Atenasen, City Plazako ostatu autogestionatuan dauden 400 errefuxiatuen bizi baldintzak hobetzeko».
Herritarrek ere laguntza ekonomikoa eman dezakete, edo Zorionekoa naiz ipuina erosi.
«Pertsonak erdigunean»
Aristregik azaldu du «horrelako proiektu txikiekin identifikatuta» sentitzen direla; «pertsonak ditu erdigunean, eta janaria bezain garrantzitsutzat jotzen du duintasuna».
Hain zuzen, Itziar Villalba eta Bea Corral hernaniarrak bertatik bertara aritu dira elkartearekin, errefuxiatuei laguntzen, eta Villalbak nabarmendu du zergatik erabaki duten proiektu hau laguntzea: «errefuxiatuak dira, gizon eta emakume horiek, City Plazan eragina daukaten erabaki guztiak hartzen dituztenak eta zeregin guztiak betetzen dituztenak. Gainera, ez da borroka eta biolentzia matxistarik onartzen».
Herritarrek ere, laguntza
Bestalde, elkarteak nabarmendu du herritarrek ere laguntza haundia ematen diotela elkarteari, eta oraindik ere badela aukera; ES23 3035 0332 25 3320011365 kontu korrontean dirua sartuta, edo Zorionekoa naiz ipuina erosita, pasaportesparasiria.es webgunearen bitartez.