Urte berriarekin, ekintza berriei heldu die Astigarragako Txirrindulari Taldeak; eta aurreneko zita, larunbat honetan jarri dute. Mendiko bizikleta topaketa antolatu dute Santiomendin, goizeko 10:00etan hasita, eta haur eta gazte guztiak gonbidatu dituzte. Ermitaren inguruko zelaietan barrena ibiliko dira, eta bertara igotzeko, furgonetak jarriko dituzte.
Beste bi ekimenen berri ere, eman dute dagoeneko. Batetik, Txirrindagan Txiki lasterketa egingo dute hirugarren urtez jarraian, kadete eta infantil mailakoentzat, apirilaren 29an.
Eta bestetik, Santiomendira kronoigoera antolatuko dute, zikloturista mailan, herriko festetan murgilduta; uztailaren 23an izango da. Horrekin, berreskuratu nahi dute, garai batean hainbeste arrakasta izan zuen erlojuaren kontrako banakako saioa: «aurten, proba modura, zikloturista mailan dabiltzan guztiei irekia egongo da. Zeinek daki aurrera begira, berriro ere ikusi ahal izango ditugun Astigarragan, etorkizuneko Santi Blanco, Contador eta bertatik pasa diren abar luze bat?», azaldu dute.
Eskola kirolaren barruan, 12 neska-mutileko taldea
Bestalde, Txirrindulari Taldea pozik azaldu da, aurten «aspaldiko partez», eskola kirolaren barruan talde bat osatu delako Herri Eskolan, txirrindularitzan parte hartuko duena: «12 neska-mutil animatu zaizkigu, kirol honetan aurreneko pausoak ematera. Ziur gaude primeran pasako dutela, eta gure laguntza eta babes osoa izango dute».