Urtea agurtzeko modu asko daude, eta horietako bat, Hernanin tradizio bihurtu dena da Ohitura Zaharrak abesbatzarekin kale buelta egitea. Arratsaldeko 17:15etan jarri dute zita udaletxe azpiko arkupetan, eta Kronikari orain aste gutxi azaldu bezala, Zaharren Egoitzan hasten dute buelta:
«solairuz solairu joaten gara. Hunkigarria da, eta uste dugu herritar guztiak gogoratu behar ditugula. Poz pixka bat ematera joaten gara, kanpokoek baino gehiago behar dutelako haiek». Buelta eginda, Plazarako bidea hartzen dute, eta Kaxkoan gora eta behera ibiltzen dira tabernetan geldialditxoak eginez. Kopla batekin hasten dira, trikitilarien laguntzaz: Dios te salve, ongi etorri, Gabon jainkoak diela... Eta segidan, bertsolariei ematen diete hitza. Paradatik paradara, trikitilariek alaitzen dute giroa.