Kalera Kalera, euskal presoen aldeko ekimenak dei egin du, gaur, 19:00etan Zinkoenean hasita osatu nahi den Giza Katean parte hartzera.
Azken asteetan antolatutako ekimenak borobildu nahi dira, horrela. Zinkoenean lau zutabetan banatuko da Giza Katea, eta bakoitzak ibilbide bat egin ondoren, 20:00ak inguruan Plazan elkartuko dira denak, «presoen senideei omenaldia eskaintzeko».
Bihar eta etzi, beste hiru zita
Presoen aldeko mobilizazio gehago ere izan dira; herenegun emakume presoen egoera ikusgarri egiteko kalejira egin zen, eta atzo, dispertsioak haurrengan eragiten dituen ondorioak aztertu ziren. Baina ekitaldi gehiago izango dira oraindik.
Bihar, Hernaniko Sortuk deituta, Martuteneko espetxera martxa egingo da, 11:00etan Zinkoeneatik abaituta. Arratsaldean, berriz, Ernai eta LABekin bat eginda, euskal preso, deportatuen eta iheslarien aldeko brindisa egingo da Plazan, 20:30etan.
Igandean, berriz, Adarra mendian ekitaldia egingo du Kalera Kalerak, 10:30etan.
Datorren astean, bukaera
Bukatzeko, datorren astean egun bakoitzean preso bana gogoratzeaz gain, urtarrilaren 6an giza katea eta kandelekin ekitaldia egingo dira Donostian, 18:30etan hasita.