Gipuzkoako Trinkete Txapelketan buru belarri aritu dira CD Hernaniko 15 pelotari. Eskuz banaka jokatu dute sailkatze fasea, eta 15etik 5ek egin dute aurrera. Azken fasea jokoan izango dute orain, eta bertan erabakiko da nortzuk izango diren irabazleak eta nortzuk galduko duten maila. Kadeteetan Ohian Zugastik erraz irabazi ditu sailkatze faseko hiru partiduak. Urtarrilaren 7an du finalerdia. Jubeniletan, Ander Lazkano eta Endika Arizmendi ere txapelketa ona ari dira egiten. Lazkano azken fasera pasa da partidu bat galduta eta bestea irabazita; Arizmendik berriz biak irabazi ditu. Gaur jokatuko dute biek finalerdia Gaskan: Lazkanok Oiarpeko Ugalderen kontra eta Arizmendik Epleko Garagarzaren aurka. Seniorretako 2garren mailan, Ander Lopez ere maila ederra ari da ematen; bi partiduak irabazi ditu eta bihar jokatuko du Epleko Lizasoren kontra final laurdena, Gaskan. Azkenik, seniorretako 1go mailan, Iñigo Labaka arazo asko ari da izaten elite mailan, eta hirutik partidu bat irabazi du. Bihar partidu erabakiorra jokatuko du Iruran, Behar Zana taldeko Arruti beteranoaren kontra; mailari eustea izango du helburu, biharkoan.
39 ume, Pelota Eskolako Txapelketan
Klubeko txikienak, pelota eskolako 39 ume, txapelketa jokatzen ari dira: 20 benjamin eta 19 alebin. Bi jardunaldiren ostean, 30 pelotarik egin dute aurrera, eta gaur, 15:00etatik aurrera, 3garren jardunaldiko 20 partidu jokatuko dira.
Giro ederra izango da beraz gaur Kiroldegiko pelotalekuan, CD Hernaniko harrobiko pelotari gazteak ikuskizuna eskaintzeko gogoz baitira.