Banatu dira 2016ko Kirol Sariak. Asteartean banatu zituzten Esti Aldeiturriaga eta Inhar Olano zinegotziek, kiroldegian egin zen ekitaldian. Emakumezkoen saria, Amaia Irazustabarrena eta Maider Huizi palistek jaso zuten; gizonezkoena, Igor Genua errugbilariak; eta Kirol Ibilbidearen Saria, Inaxio Sanz eta Joxe Zuza mendizaleek.
Sariak banatu aurretik, herri kirol erakustaldia egin zuten eskubaloi, boleibol eta atletismoko neska-mutilek.
Herritarren parte hartzeak gora egin du, aurreko urtetik.
500 herritarren botoak
Herriko kirol taldeek bost hautagai aurkeztu zituzten saria jasotzeko, eta herritarrak izan dira saridunak nortzuk izango ziren aukeratu dutenak.
Astearteko ekitaldian, Manolo Aierbe kirol dinamizatzaileak azpimarratu zuen 500 boto inguru jaso direla; «joan den urtean 100 inguru» izan baitziren. Era berean, nabarmendu zuen «botoen %90 euskeraz» eman direla, eta «gizonezkoek baino, emakumezko gehiagok» eman dutela botoa.
Esti Aldeiturriaga zinegotziak, bestalde, zorionak eman nahi izan zizkien «irabazleei, bozketan parte hartu duten herritarrei eta Hernaniko klubei, elkarrekin egindako lanagatik».