Bigarren urtez, etxebizitzen alokairua ordaintzeko diru-laguntzak emango ditu Udalak. «Bi helburu nagusi ditu», azaldu du, «bereziki, gazteak, emantzipazio bidean laguntzea eta herrian etxebizitzen alokairua sustatzea».
Laguntza, irailetik abuztura bitarteko gastuetarako
Deialdi honen bidez lagunduko diren alokairu gastuak izango dira, 2016ko irailaren 1etik 2017ko abuztuaren 31ra bitartekoak.
Eskaerak egiteko epea urtarrilaren 27ra arte egongo da zabalik, Herritarren Harrera Zerbitzuan, astelehenetik ostiralera 08:00etatik 14:00etara, edo arratsaldeetako Erregistro Zerbitzuan, 14:00etatik 19:00etara. Argibideak ere emango dituzte telefono bitartez, 943 33 70 00 zenbakian, edo hhz@hernani.eus helbide elektronikoan. Era berean, eskaera-orriak eta deialdiaren oinarriak, www.hernani.eus webgunean lortu daitezke.
Gehienez, 650 euroko alokairuak
Diru-laguntza jasotzeko baldintzen artean daude, batetik, eskaera egiten duena Hernanin erroldatua egotean, gutxienez urtebetez; eta bestetik, alokairua, gehienez, hilean 650 eurokoa izatea. Era berean, diru-sarrerei dagokien gehienezko muga urtean 21.000 eta 39.000 euro gordin artekoa izango da, bizikidetza unitate motaren arabera.
Diru-laguntzak bi lerrotan banatu dira: 82.000 euro banatuko dira 18-35 urte bitarteko herritarren artean; eta beste 82.000 euro, 36 urtetik gorakoen artean.