Urtea borobiltze aldera, Bertsolata jaialdia antolatu du aurten ere Iraulio Panttalone, Hernaniko Bertso Eskolak. Bihar eta etziko zitak izango dira urteko azkenak.
Biharkoa, Bertso Jaialdia izango da, 22:00etan hasita, Biteri kultur etxean; ordu erdi inguru lehenago jarriko dira salgai sarrerak, 6 euroan. Eta sei izango dira, kantuan ariko diren bertsolariak ere: Sebastian Lizaso, Unai Agirre, Beñat Mujika, Etxahun Lekue, Nerea Elustondo eta Aitor Mendiluze.
Erronda, urtea bukatzeko
Etzi, Urte Zahar egunean, berriz, urteroko errondan aterako dira Hernaniko bertsolariak, Ohitura Zaharrak abesbatzako kideekin batera, 17:15etan arkupetatik abiatuta. Aste honetan, bestalde, Miren Amuriza izan da Biterin, Kapulana bat zintzilik emanaldia eskaintzen.