Abenduaren 18an, Migratzailearen Nazioarteko Egunean, festa egin zen Inmakuladan, eta gaurkoan festa horri jarraipena eman nahi diote Hernani Solidarioa osatzen duten elkarteek: Amher, Atawafok, Bilgune Feminista, Hernaniko Caritas, KENKT, Kooperazioa, SOS Hernani Errefuxiatuak, Stop Kaleratzeak eta SUTU. Arratsaldeko 18:30etatik aurrera musika eta jatekoa izango dira Plaza Berrin, eta hernaniar guztiei dei egin diete parte hartzera, «beste nazio batzuetan jaio eta gurekin Hernanin bizi diren etorkinen ekarpena aintzat hartzeko».
«Guztiok tokia izango dugun Hernani baten alde lanean jarraituko dugu»
Hain zuzen, Migratzailearen Nazioarteko Egunaren harira, komunikatu bat ere irakurriko dute gaur arratsaldean. Bertan, gogoraraziko dute «pertsona migranteen egoera eta haiekiko jarrerak gogortzen» ari direla: «Europa eta mundu mailan, diskurtso eta ekintza politiko xenofobo eta populistak indartzen ari dira».
Baina, era berean, azpimarratu dute «errespetuzko gizarte batean sinetsi eta benetako bizikidetzaren alde lan egiteko prest dagoen pertsona asko» dagoela; «horixe erakutsi genuen Hernanin ospaturiko Bizilagunak ekimenarekin». Hori horrela, azaldu dute: «guztiok tokia izango dugun Hernani baten alde lan egiten jarraituko dugu».