Hernanik Guinnes Errekorra jasoko du, aldarrikapen gehien dituen herria izateagatik

Hernani Zero Zabor herria!, Fracking ez! Errausketarik ez!, Herri honetan ez da eraso sexistarik onartuko!, AHTrik ez!, Kaxkoa ixilik, Kaxkoa bi­zirik!, Euskal presoak euskal he­rrira!, Hernani ez da Ve­ne­zia, uholdeei irtenbidea ya!, Kar­bonera bizirik!, Etxe hutsak okupatu! Intsu­mi­sioa, LOMCEri ez!, Euskara ari du! Gaur hautestontzia, bihar erabakia... eta beste do­ze­na­ka alda­rri­kapen ira­ku­rri dai­tezke Hernanira sar­tu or­duko. Alda­rrikapenei dago­kienean, munduan ez du pa­rekorik Hernanik. Hori ba­liatu nahian, herritar talde ba­tek eskaera egin dio Guinness World Records fundazioari. 

John McBear Hernanin izan da zenbaketa egiten
Kronikari prentsa ohar bidez azaldu diotenez, hiru hila­be­tez itxaron os­tean, jaso dute eran­tzuna: «jarraitu be­ha­rreko proze­duraren berri eman digute gu­tun zertif­i­ka­tu baten bi­dez». Lehenengo pausua, John McBear ikus­ka­tzailearen bisita izan da. Her­na­nin izan zen joan den astean eta tal­deko bi ar­duradunekin ba­tera, herrian barrena ibili zen kartel, pintada eta bes­telako mezu edo aldarriak zen­batzen: guztira 481 zen­ba­tu zituzten. Hausnarketa egin ostean, Irlandara bueltan da McBear. Orain arteko errekorra Me­xi­koko Chiapas estatuko San Cristobal de las Casas hiriak zuen, 377 aldarrikapenekin. 

Ekitaldi ofiziala, gaur
Guinnes errekorrak 1955 ur­tetik banatzen ditu Guinness World Records fundazioak. Le­hendik ere, hernaniar ba­tek badu hain desiratua den errekonozimendu hau: Xa­bier Salillasek. Oraingoan ordea, he­rri osoak jasoko du ai­tor­tza. Ekitaldi ofiziala gaur iluntzeko 19:00etan izan­go da Biteri kultur etxean. Herri­tarrak gonbi­datu dituzte ar­gazki ofiziala ateratzera.