Sorrera urtea izan du 2016a, BagaGiltza taldeak; eta bukaera emateko, Gabonetako jaialdia antolatu du etzi, Astigarragan. Goiko Itturrin izango da, Apeztegi plazan, 17:00etan hasita.
Herritar guztiei luzatu diete gonbitea, Gabon festa honetara gerturatzeko: «hurbildu eta gozatu, goxatu, 2017a bero bero datorkigu eta!». Denetik izango da bertan, arratsalde polit batez gozatzeko: eskulanak, dantza, kantua, antzerkia...
«Olentzerori zer eskatu diogun jakin nahi?»
Beste sekretutxo bat ere aurreratu dute, gainera: «guk ere bidali diogu eskutitza Olentzerori...». Eta pista bat ere eman dute, eskatu diotena zer ote den asmatzeko: «2017rako ezinbestekoa zaigun gauzatxo bat eskatu diogu. Zer den jakin nahi? Jaialdira hurbildu eta ikusiko duzu!», animatu dituzte herritarrak.
2017a izango da herri galdeketaren urtea, Hernanin eta Astigarragan; martxoaren 19an egingo dute; eta sinadurak biltzen jarraitzen dute.
Urte Zahar egunean ere, sinatzeko aukera
Hain justu, urteko azken egunean izango da sinatzeko aukera: esne makinaren ondoan, 19:00etatik 20:00etara.