Asteburu bikaina izan zen aurrekoa korrikalarientzat. Horien artean, nabarmentzekoa da Eva Esnaolaren emaitza: munduko errekorra egin du 24 eta 12 ordutan, beteranoen mailan. Bartzelonan izan da hori, Can Dragó pistetan; hirugarren izan zen sailkapen orokorrean.
24 ordutan 217,811 km egin zituen, eta hala gailendu zuen Rimma Paltseva errusiarrak 2014an egindako errekorra, 214,586 km-takoa. Bestalde, 12 ordutan ere errekorra egin zuen 126,309 km-rekin.
Guerrero, bigarren
Baina ez zen asteburuko emaitza bakarra izan. Bigarren izan zen Hoki Guerrero Atletico de SS-k antolatu zuen 36garren Cross Beachean.
Hainbat korrikalari, Arraten
Azkenik, Arraten izan ziren beste hainbat korrikalari, Bolumburu Memorialaren 67garren Krossean. Hauek izan ziren emaitzak: alebin mailan, bigarren izan zen Amaiur Velez; txapeldun Anartz Artola eta bigarren Yohanes Merino jubeniletan; M40an, hirugarren, Txelu del Sol; eta M75ean, aurrenekoa, Jose Maria Murua.