Olentzero iritsiko da gaur Hernaniko etxeetara, herritarrek bere etorrera musikatu ondoren. Goizean, herriko eskolek egingo dute gabon erronda, herrian zehar: 10:15etan aterako dira Inmakulada ikastetxeko ikasle, irakasle eta gurasoak; 10:30etan, Urumea ikastolakoak; 11:00etan Txantxilatik Langile ikastolakoak; eta 11:45etan, Elizatxo ikastolakoak.
Eguerdian baita ere egingo dute kale-buelta Kantuz abesbatzakoek. Azken orduko aldaketa baten ondorioz, 12:00etan aterako dira Milagrosatik.
Hainbat zita, arratsaldean
Arratsaldean, estilo desberdinetako ekintzak izango dira herrian. 15:30etan hasiko dute erronda Bertso Eskolakoek, Biteritik. Ondoren, Parrokiko abesbatzaren emanaldia izango da 17:00etan, Agustindarren elizan.
18:00etan abiatuko da Olentzero Plazatik, Ttarlako dantzariekin batera.
Eta eguna bukatzeko, Hernaniko Musika Bandak zeharkatuko ditu kaleak 20:00etatik aurrera, Plazatik.