Abenduaren 1etik martxan da Astigarragan edukiontzien sistema berria. Udalak Kronikara bidalitako prentsa oharrean gogoratu du, ordutik, papera-kartoia eta ontzi arinak, herrian zehar jarri diren edukiontzietara eraman daitezkeela. Era berean, gogoratu dute, organikoari eta errefusari dagozkien edukiontziak, hurrenez hurren, urtarrila bukaeran eta apirilean zehar jarriko direla: «atal horientzat, oraingoz, atez ateko egutegia jarraituko da».
«Egutegia ez da errespetatzen ari»
Udalak prentsa oharrean azaldu du, hala ere, egutegi hori ez dela errespetatzen ari, eta aipatutako edukiontzien inguruan hondakin pilaketak sortzen ari direla: «Udalak moztu egin nahi du hondakinak modu desegokian eta arazoak eraginez ateratzearen kontu hau. Horretarako, informazio kanpaina bat egingo du: herritarrei gaikako bilketa nola hobetu erakutsiko zaie, eta orokorrean, birziklapenaren aldeko konpromisoa sustatuko du».
«Gizalegez jokatzeko deia egiten dugu»
Udalak, bitartean, gizalegez jokatzeko deia egin die herritarrei: «hau da, egun dagoen bilketa egutegia errespetatzea: egunero papera eta kartoia edukiontzi urdinetara eramango dira, eta ontzi-arinak horira. Organikoa, urtarrila bukaera bitartean, atez ateko sistemarekin jasoko da, astelehen, ostegun eta larunbatetan, kuboak erabiliz. Errefusa, apirila bukaera bitartean, bi igandero aterako da. Eta azkenik, konpresa eta pardelak egunero atera ahal izango dira, orain arte bezala».
Bukatzeko, Udalak gogorarazi nahi izan du denen erantzukizuna dela herria txukun edukitzea.