Iritsi da Gabonetako egun haundia: Olentzero eta Maridomingi bidean dira. Urumea bailaran, herriz herri ibiliko dira, txikienekin bildu, eta opariak banatzen. Astigarragara Santiomenditik barrena iritsiko dira, eta 11:30etan inguruan Joseba Barandiaran plazan egongo dira, gutunak jaso eta neska-mutilekin hitz egiteko gogoz. Goizuetan ere, herritarrekin izango dira Olentzero eta Maridomingi: 18:30etan espero da, etorrera. Misterioz eta emozioz betetako eguna izaten da gaurkoa, eta komenigarria da goiz-goiz oheratzea.
Etxez etxe kantari, egun osoan
Gaurko egunez ohitura izaten da, baita ere, auzoz auzo, etxez etxe kantari ateratzea. Goizuetan 11:00tan aterako dira eskolakoak; eta 15:30etan presoen aldekoa aterako da. Aranon, urtero bezala, herriko baserri eta etxe guztietara joango dira gaztetxoenak, goizetik hasita. Ereñotzun ere, ez da Gabon kantarik faltako: gaztetxoen abesti eta musika bazter guztietara zabalduko da. Eta Astigarragan zer esanik ez! Herriko kale, komertzio eta etxeetan barrena ibiliko dira neska-mutilak, kantu kantari. Arratsaldean gainera, 16:00etan hasita, euskal preso eta iheslarien Olentzeroa aterako da, Oialumetik.