Egun garrantzitsua izango da biharkoa Hernaniko Eskubaloi Taldearentzat. Lan haundia egin ondoren, arratsaldeko 17:00etan emango zaio hasiera Eskubaloi eskolen arteko 1go topaketari.
Kiroldegian izango dira partiduak, eta sari banaketarekin emango zaio bukaera topaketari, iluntzeko 20:00ak aldera.
Zortzi talde, eta Zarauzko neskak
Denera zortzi taldek hartuko dute parte biharko topaketan, eta horien aurkezpenarekin emango zaio hasiera topaketari, arratsaldeko 16:30etan. Horietatik zazpi gipuzkoarrak dira, eta bizkaitar bat ere badago: Hernani bera; Errenteriako Ereintza, Donostiako Bera Bera, Martuteneko Saieko, Zumaiako Pulpo, Elgoibarko eskubaloi taldea, Zumarragako Urola, eta Bilboko Urdaneta.
Horrez gain, Zarauzko neskak ere izango dira topaketan, eta hala «estatu mailan erreferentziazkoa den taldeak ordezkaritza izango du», azaldu du Eskubaloi taldeak.
Bi multzo, neska eta mutiletan
Talde horien artean, bi txapelketa izango dira parez pare: neskena, alde batetik, eta mutilena, bestetik.
Bi txapelketak bi multzotan jokatuko dira hasiera batean, eta horien arteko norgehiagoken arabera jokatuko dira finalerdiak.
Mutilen partiduak 17:00etan hasiko dira; neskenak, berriz, 17:10etan. Bi kasutan, A multzoak 1go pistan jokatuko ditu partiduak, eta B multzoak 2garren pistan.
Ondoren, multzo bakoitzeko aurreneko biek jokatuko dituzte finalerdiak; arratsaldeko 19:00etan hasiko dira mutilenak, eta 19:10etan, neskenak.
Bukatzeko, finalak izango dira finalerdietako aurreneko bien artean: mutilena 19:40etan, eta neskena, 19:50etan. Biak, kiroldegiko 1go pistan.
Zortzi gune, kiroldegian
Topaketa aurrera eramateko, zortzi gunetan banatu dute kiroldegia. Aurreneko gunea, sarrera nagusiaren parean egongo den horretan, egingo dira harrera eta taldeen akreditazioak arratsaldeko 16:00etan hasita. Bigarren gunea informazio puntua izango da, eta tabernaren ondoan egongo da. Hirugarrena, eserlekuen parean izango da, eta saltoki bezala erabiliko dute. Laugarrena, leku berean; bertan banatuko dute merienda 19:40etan. 1go pista izango da bosgarren gunea, eta 2garren pista, aldiz, zortzigarrena.
«Aurreneko aldia da Hernanin horrelako topaketa bat antolatzen dela»
Oso pozik agertu dira Hernaniko Eskubaloi Taldeko kideak topaketa honen aurrean: «aurreneko aldia da Hernanin horrelako topaketa bat antolatzen dela, eta uste dugu Gipuzkoan ere lehenengo aldia dela». Kanpotik ere, aurreneko haziak ikusi dituztela azaldu dute: «egia esan, topaketaren antolaketagatik zoriontze ugari jasotzen ari garela».
MULTZOAK
NESKAK A MULTZOA: Zarautz, Saieko, Elgoibar, Pulpo.
NESKAK B MULTZOA: Hernani, Bera Bera, Ereintza, Urola.
MUTILAK A MULTZOA: Hernani, Urola, Bera Bera, Ereintza.
MUTILAK B MULTZOA: Urdaneta, Pulpo, Saieko, Elgoibar.
EGITARAUA
16:00-16:30 Akreditazioen banaketa eta taldeetako entrenatzaileekin bilera 1.gunean
16:30-16:45 Taldeen aurkezpena
17:00 1. zatiko partiduen hasiera. 1. eta 2. pistan.
19:00 Finalaurrekoen hasiera. 1. eta 2. pistan.
19:40 Finalak 1. eta 2. pistan. Finaletarako sailkatu ez diren taldeek meriendatzeko aukera izango dute. 4. gunean.
20:00 Mariskadaren zozketa, sari banaketa eta topaketaren amaiera. 3. gunean.