Gabonetako egun haundienetako bat biziko dute larunbatean Astigarragako txikienek: Olentzero eta Maridomingiren etorrera. Santiomenditik barrena jaitsiko dira biak, opariak banatu aurretik, herritarrekin elkartzera. Joseba Barandiaran plazan egongo dira 11:30etatik aurrera, eta banaka, neska-mutilek gutunak eman eta beraiekin hitz egiteko aukera izango dute.
Jolasak eta gehiago umeentzako, oporretan
Urte sasoi honetan Gabonetako oporretan murgilduta izaten dira txikienak, eta aurten ere, jolas eta solas, ez dute aspertzeko tarterik izango. Txikienentzako Jolas Txiki antolatu dute; eta koxkorragoentzako Ludoteka; bi kasuetan aurrez eman behar zen izena. Jolas aretoa ere izango da Gabonetan, kasu honetan, irekia izango da.
Eta haurrekin jarraituta, urtarrilaren 2an, arratsaldean, Detstvo errusiar dantza taldea izango da Kiroldegian, 18:00etan; sarrera, 2’5 euro.
Azkenik, aurtengo haur parkerako fetxa ere jarri dute: urtarrilaren 4an izango da, goiz eta arratsalde, Kiroldegian baita ere.
Gabonetako jaialdia, Gure Esku Dagok
Gabonekin bukatu aurretik, Gure Esku Dagok ere jaialdia antolatu du. Abenduaren 30ean da, 17:00etan hasita.