«Zorroztasuna falta dela ikusi dugu, iaz negoziatutako partidetan»

Udal Gobernu Taldeak aurkeztutako 2017ko Udal Aurre­kontu proposamenari osoko emendakina aurkeztu dio PSE-EE alderdiak.
Herenegun, prentsaurrekoan azaldu zituen zergatiak.

«Aurrekontuak ez dira egokitzen hernaniarren behar eta eskakizunetara»
Ricardo Crespo, PSE-EEko bo­ze­ramaileak azaldu zituen osoko emendakina aurkezteko arrazoiak. «Bilduren neurrira egindakoak dira, eta ez dira egokitzen hernaniarren behar eta eskakizunetara».
Hala erakusten du, Cres­poren ustez, «atez atekora 1.758.000 euro bideratzeak, San Markora 260.000 euro, eta auzo konpostera 52.000 euro». Bizilagunek beste sistema bat nahiago dutela diote sozialistek. «Horren adibide da, Her­nani Erabaki prozesuan herritarrek egindako proposamena, hondakin bilketa sistemaren inguruan galdetzearena, atzera bota zuela EH Bilduk, bere praktiken kontra zijoalako. Gure ustez, horiek ez dira aurrekontu parte-hartzaileak».
Bestalde, sozialisten ustez «bitxia da auzo konposterako partida 22.000 euro haundi­tzea, eta kale garbiketakoa, 10.000 euro bakarrik. Gainera, fatxadak garbitzeko partida ezabatu da». 

«Inbertsioetan, ausardia falta»
Era berean, «inbertsioetan au­sar­dia falta» dela diote sozia­lis­tek. «Karabelerako 100.000 eu­ro bi­deratzea ez da nahikoa; ge­ra­ki­narekin partida haundituko omen du Gobernu Tal­deak, bai­na badakigu zer gertatu zen au­zoko bigarren fasearekin ere». 
Bestalde, «iaz negoziatutako partidetan zorroztasun fal­ta» salatu dute sozialistek. Aipatu dituzte zarata mapa eta, artistentzako diru-la­gun­tzak berandutu izana...