Ezin izan zion Independienteri irabazi atzo Hernanik, bueltako aurreneko partiduan; 18 eta 22 galdu zuen. Entsegu gutxi, eta txartel hori dezente izan ziren; talde bakoitzak hiruna jaso zituen.
Hasieran, itxaropentsu
Hasieratik Independiente aurretik jarri bazen ere, atsedenaldira 15 eta 13 aurretik zijoaztela iritsi ziren etxekoak; Mikel Perez eta Iñaki Otxotorenaren entseguekin, Igor Genuaren transformazio batekin eta Anartz Elosegiren zigor kolpe batekin. Independientek, berriz, entsegu bakarra eta zigor kolpeen bidez lortu zituen puntu guztiak.
Ezin eutsi
Bigarren zatian, ordea, ihes egin zion partiduak Hernaniri. Hasi eta berehala, Independiente aurreratu zen, 15 eta 16, zigor kolpe batekin. Bana egin zuten gero, Independientek eta Hernanik (Genua); 15 eta 19 eta 18 eta 19. Bukatzeko minutu gutxi falta zirela, azken zigor kolpearekin irabazi zuen Independientek, 18 eta 22.
Esukadiko Selekzioarekin hernaniarrak, finalean
Emakumezkoen Euskal Selekzioak, ordea, lortu du bigarren mailako Txapelketa Autonomikoan finalera iristea, eta bertan jokatzen ari dira hiru hernaniar: Enara Cacho, Leire Rodriguez eta Irati Ormazabal.
Atzo 86 eta 0 irabazi zioten Murtziari, eta gaur, 12:00etatik aurrera finalean izango dira, Malagako Rincón de la Vitoria zelaian, Andaluziaren kontra; azken honek Balear Uharteei irabazi zien, 24 eta 0.
Gaurko irabazleak urtarrilean izango du igoerako partidua, Gaztela eta Leon edo Valentziaren aurka.
Errugbi inklusiboa, goizean
Urrutira joan gabe, Landaren ere izango da gaur giroa; 10:00etan, errugbi inklusibo saioa egingo da.
Denda, irekita
Bestalde, klubak jakinarazi du Gabonetarako denda ireki duela aurten ere, Portalondo parean, Atzieta kalearekin izkin egiten duen lokalean.