«Guztiok tokia izango dugun Hernani baten alde lan egiten jarraitzeko» eguna da gaurkoa, Amherrek eta SOS Arrazakeriak prentsa ohar bidez azaldu dutenaren arabera. Izan ere, gaurkoa Migratzailearen Nazioarteko Eguna da.
«Gerretatik ihes egiten duten errefuxiatuetan dago orain gure arreta, baina babesa ukatzen zaie, nazioarteko hitzarmenek aitortzen dieten eskubidea urratuz», azaldu dute. Era berean, gogorarazi dute «diskurtso eta ekintza politiko xenofoboek aurrera egin» dutela.
Baina azpimarratu dute «errespetua eta bizikidetzaren alde lan egiteko prest dagoen jende asko» dagoela, eta halaxe erakutsi zuela Hernanik ere, Bizilagunak ekimenean. Gaur ere, Amherreko kideak Inmakuladan elkartuko dira, bazkaritan.