Garai honetan, postre berezirik bada, Erregetako roskoa izaten da: «urtean behin jaten dugunez, irrikitan egoten gara», dio Mikel Garmendiak, Sulabeko okinak. Etxean ere egin daiteke, nahi izanez gero: «ez da zaila egiten, baina eskulana eta denbora eskatzen du». Roskoaren berezitasun nagusiak nabarmendu dizkigu, azahar urak eta nata edo krema onak ematen dioten zapore berezia; eta roskoa nola egiten den ere azaldu digu.
«Aurrena egiten da masa madre bat, esponja deitzen zaiona», dio Garmendiak. Horretarako, amasatuko ditugu irin sendoa (harina de fuerza), ura eta lebadura, eta gero, fermentatzen utzi, bere tamainaren bikoitza hartu arte.
Eta behin hori fermentatuta, bigarren faseari helduko diogu: «hortik aurrera hasten gara roskoa egiten. Berriro gehitzen diogu irina, azukrea eta eztia, arrautzak, eta gurina. Eta horretaz aparte, daramaki lebadura, fermentatzeko; eta gatza, beti izan behar du pixka bat, konserbante lanak egiteko, eta zaporearen potentziadore lana egiteko». Esponja edo masa madrea eta osagai berriak, elkarrekin amasatuko ditugu, beraz.
Gero, bola bat egin eta 10 minutuz utziko dugu bere horretan. Eta ondoren, roskoaren forma emango diogu masari, eta berriro utziko dugu fermentatzen, hasierako tamaina bi eta erdi bider haunditu arte.
Eta noiz sartuko diogu baba edo figura?
Dekoratzeko garaia iritsi zaigu, eta fruta eskartxatuak jartzea izaten da ohikoena: ginda, laranja, meloia... «Oso garrantzitsua da adornatzea, kolore politak begitatik sartzen zaizkigu eta erakarri egiten dute. Baina gero, uste dut 10etik 9k, kendu egiten dizkiogula!», dio Garmendiak: «itxurak asko egiten du, baina itxura txarreko roskoa gustorago jango nuke, osagaietan kargatuagoa dagoen seinale da eta! Hainbeste hazi ez den roskoa goxoagoa izaten da».
Eta baba edo panpina ere sartu beharko diogu, noski! Noiz sartuko diogu? Ba masa egiten dugunean, orduan sartu daiteke; edo bestela, behin roskoa egin eta erditik zatitzen dugunean, nata edo kremarekin batera sartu dezakegu.
ERREGETAKO ROSKOA (10 pertsonentzako osagaiak)
Esponjarako:
Irin sendoa
Ura
Lebadura
Masarako:
Irin sendoa (400 gr)
Gatza (5 gr)
Azukrea (75 gr)
Arrautzak (3)
Laranja rallatua (erdia)
Limoi rallatua (erdia)
Ron (10 gr)
Mantekilla (125 gr)
Azahar ura (8 gr)
Lebadura (33 gr)