Gainean dauzkagu Gabonak, eta horren harira, hainbat kontzertu izango dira egun hauetan herrian. Hasteko, gaur bertan bi izango dira.
Saxoak eta akordeoiak, bat
Gaurko aurreneko kontzertua 18:30etan izango da, Milagrosan. Musika Eskolako Hernasax saxofoi taldea eta Akordeoi taldea elkarrekin ariko dira.
Hamabi kantu, sei abesbatzen ahotsetan
Bigarren emanaldia, San Joan Bataiatzailea parroki elizan izango da, 20:00etan. Gabonetako kantuak abestuko dituzte sei abesbatzek: Kantuzek, San Joan Parrokikoak, Musika Eskolako gaztetxoenak eta Dakapok, Goiz Eguzkik eta Ozenkik.
Abesbatza bakoitzak bi abesti kantatuko ditu; denak, Gabon girokoak.
Bihar, beste emanaldi bat
Gabon giroan sartuta, emanaldi gehiago ere izango dira.
Bihar bertan, Ozenki abesbatza eta Goizuetako Umore Ona elkarrekin ariko dira, Hernaniko Musika Bandarekin batean; 20:00etan elizan, baita ere. Gainera, CD Hernaniren 75garren urteurrena eta Goizuetako Umore Ona abesbatzaren 10garren urteurrena izango dituzte gogoan.
Ttarlako dantzariak, kalejiran
Bestalde, bihar eguerdiko 12:00etan Plazatik abiatuta, Ttarlako dantzariak kalejiran ibiliko dira. Datozen egunetan ere, Gabon kontzertu gehiago izango dira.