Garfe enpresako pelotari onenak Hernanin izango dira bihar, arratsaldeko 19:00etatik aurrera kiroldegian jokatuko den esku pelota jaialdian; Titin III eta Xala, hain zuzen ere.
Baina bi izarrak ez dira bakarrik ariko. Ondoan izango dituzte dagoeneko askotan haiekin jokatu izan duten Ojuel eta Aizpitarte, eta baita Buruntzaldeko pelotari onenak ere.
Jaialdia Garfe enpresak berak antolatu du, CD Hernaniko esku pelota sailaren eta kiroldegiaren laguntzarekin.
Hiru partidu
Arratsaldeko 19:00etan hasiko da jaialdia, eta hiru partidu jokatuko dira, denera.
Aurrenekoa, Hernaniko esku pelota eskolako infantilen artekoa izango da: Uitzi eta Insausti II, Apaolaza eta Oiartzabalen kontra ariko dira.
Bigarren partiduan, berriz, Titin IIIk Gorrotxategirekin osatuko du bikotea, eta Ojuel eta Santxez izango dituzte aurkari.
Azkenik, hirugarren partidua jokatuko dute Xalak eta Aizpitartek, Arrieta eta Lizeagaren kontra.
Sarrerak aurretik, Onddin
Dagoeneko sarrerak salgai daude, esku pelota jaialdi haundi honekin gozatzeko. Aldez aurretik erosiz gero, 8 euroan izango dira, Onddi tabernan.
Bihar ere jarriko dira salgai, kiroldegian bertan, jaialdia hasi baino lehen. Baina, kasu honetan, 10 euroan.