Ez da ez, marka makala! Kronikalaririk ez da falta, Urumea bailaran. Aurten, Gabonetako errifak atera beharrean, Kronikalari bat, euro bat kanpaina jarri da martxan, eta Hernanin, Ereñotzun, Astigarragan, Aranon eta Goizuetan jarri diren eltxetxoean, 10,8 kilo diru bildu da azken bi asteetan.
Orain, berriz, Dirutan asmatu, ezetz! lehiaketa jarriko da martxan. Gaur hasi eta datorren ostiralera arte hartu ahal izango da parte.
Egin apustu!
Lehiaketan parte hartzeko, jasotako diru kiloak dirutan zenbat diren asmatu beharko da. Bakoitzak behin bakarrik egin ahal izango du apustua.
Bi modu izango dira lehiaketan parte hartzeko. Batetik, albiste honi www.kronika.eus webgunean iruzkinak egitea. Bertan idatzi beharko da bakoitzaren ustez zenbat den dirutan, bildutakoa.
Bestetik, Kronikan bertan jarri den kutxan idatzita utzi daiteke apustua, izen-abizenak eta harremanetarako telefonoarekin batera.
150 euro, Urumean gastatzeko
Parte hartzeko epea itxiko da ostiralean, hilak 9, eguerdiko 12:00etan. Hurrengo egunean jakingo da nork irabazi dituen 150 euro, Urumea goialdeko komertzio, denda, jatetxe... edo negozio batean gastatzeko. Eta noski, orduan jakingo da, zenbat diru bildu den!