Bio Racer Sarian murgilduta dabiltza Astigarragako txirrindulariak. Dagoeneko bi jardunaldi jokatu dituzte, eta gaur arratsaldean izango dute hirugarrena Anoetako belodromoan.
Bigarren, Urko Semperena
Indartsu ekingo dio Urko Semperena junior mailako txirrindulariak gaurko hirugarren jardunaldiari. Izan ere, bi jardunaldi jokatuta, sailkapeneko bigarren postuan da Semperena astigartarra.
Aurreko larunbatean, Bio Racer Pista Sariaren hirugarren jardunaldian, egindako lan bikainaren emaitza izan zen hori. Bi proba izan zituen txirrindulari juniorrak: hirugarren izan zen scratch proban; bigarren, berriz, puntuazio proban. Ondorioz, sailkapenean hobetu, eta laugarren postutik salto egin du bigarren postura, Limousin taldeko Unai Iribar lider berriaren atzetik. Aurreneko postuetan mantentzea izango du helburu, dudarik gabe.
Bestalde, bigarren izan zen Xabier Mikel Azparren puntuazio proban. Eta hamaseigarren postuan geratu zen Tomas Otermin scratch proban; ondorioz, hogeitalaugarren dago sailkapen orokorrean.
Postu berean, Telmo Semperena
Kadete mailako txirrindulariek ere jokatu zuten bigarren jardunaldi hau. Gainera, Telmo Semperenak lidergoa galdu, eta Limousineko Julen Dorronsorok bereganatu zuen bigarren zita honetan.
Seigarren izan zen Semperena parte hartu zuen bi probetan, japoniarrean eta puntuazio-proban. Aurrenekoan Zarauztarra taldeko Iñigo Eizaguirre izan zen garaile; bigarrenenean, ordea, Limousin taldeko Julen Dorronsoro, sailkapen orokorrean lidergoa lortu zuena.
Jaime Romero ere bertan izan zen, eta erakutsi zuen lehenengo urteko txirrindularirik hoberenetarikoa dela. Zortzigarren izan zen japoniar proban, eta hamaikagarren puntuazio-proban. Hortaz, hamahirugarren doa sailkapen orokorrean, eta aurreneko urtekoen artean, bigarren.