Hernaniko Lanbide Heziketako Gizarte Berrikuntzako LHII zentroan ikasi du Roberto Salvador Gonzalez hernaniarrak. Pasa den ikasturtean bukatu zuen Goi Mailako Fabrikazio Mekanikoko Diseinu zikloa, eta bataz besteko nota 8,5ekoa baino altuagoa duenez, Karrera Amaierako Saria jasoko du asteartean, Kutxa Fundazioaren eskutik.
Sari banaketa Miramongo Eureka! Zientzia Museoan egingo da, 19:00etan.
Ikasketak aurreko ikasturtean bukatu zenituen, eta lana aurkitzea ere saria da egun... Lanean ari zara?
Martxoan praktikak egin nituen, maiatza bukaerara arte, eta ekainean bukatu nituen ikasketak. Orain enpresa horretan, praktikak egin nituen horretan, ari naiz lanean.
Eta sari horri, Karrera Amaierako Saria gehituko diozu asteartean. Espero zenuen?
Orain bi aste deitu zidan Lanbide Heziketako zuzendariak, berria emateko. Nire espedientea bidali omen zuten. Sorpresa haundia izan da, ez bainekien sari hauek bazirenik ere!
Nik badaezpada informazioa eguneratu dut Infojobs eta Linkedinen!
Zergatik aukeratu zenuen ikasketa hauek egitea?
Arkitektura egin nuen lehenago, baina mundu hau dagoen bezala dagoenez, eta estudio batean sartzea ezinezkoa zenez, autonomo egin nintzen, eta nire kabuz hasi nintzen lanean. Baina diru sarrerak txikiak izaten dira, eta autonomo gastua, haundia! Horregatik erabaki nuen Fabrikazio Mekanikoko Diseinua ikastea. Gustatu egiten zait mundu hau, eta lagun batek ere egina zuen.
Sari hau jasotzeak onurarik ekarriko dizula uste duzu?
Gustatuko litzaidake, kasu honetan behintzat, nota onak ateratzeak garrantzia edukitzea. Baina esango nuke enpresa txiki edo ertainek nahiago dutela esperientzia duen norbait kontratatu, nota onak dauzkana baino. Baina hau izan daiteke puntu bat. Nik badaezpada informazioa eguneratu dut Infojobs eta Linkedinen!