Motokross zirkuitoa berreskuratu du Aranok, berriro ere. Lehengo asteburuan egin zen ekitaldia, pista eraberritua ireki eta Juan Fermin Rekarte motorzale zenduari omenaldia egiteko.
Omenaldia eta erakustaldia
Eguraldia lagun, ehundik gora lagun bildu ziren Aranon, igandean. Bertan izan zen, baita ere, Juan Fermin Rekarte motorzale zenduaren familia; bai gurasoek eta baita anai-arrebek ere, eskerrak eman nahi izan zizkieten aranoarrei eta Udalari, Rekarteri omenaldia egiteagatik. Kanpoan bizi arren, sarri joaten zen Rekarte Aranora, motokrossean ibiltzera, baina istripuz hil zen, duela urtebete. Hori horrela, herriko motokross zirkuitoari haren izena jarri diote.
Plaka jarri ondoren, motokross erakustaldia ere izan zen, Fly Group taldeak antolatuta. Izan ere, talde honek kudeatuko du pista datozen urteotan, Udalarekin sinatutako hitzarmena medio. Erakustaldirako, Ander Valentin piloto nafarra ekarri zuten, eta ikusleak zur eta lur geratu ziren, motorzalearen abilezia ikusita.