Lehiaketan 70 logo inguru jaso ondoren, dagoeneko aukeratu du bere irudi berria, Hernaniko Arraun Elkarteak. Unai Gomez donostiarrak aurkeztutakoa izan da irabazlea, eta 150 euroko saria jasoko du.
«Logotipoaren geometrikotasunak modernitatearen ideia bereganatu nahi du, gainontzeko klubetatik bereiztuz. Logoaren konposizioa, ura ikutzen ari den arraun batek osatzen du», azaldu du Gomezek.
Jon Altuna ‘Oxan’ena, kamixetako irudia
Baina bigarren proposamen bat ere aukeratu du elkarteak, Maialen traineruaren kamixetako irudia izango dena, hain zuzen ere: Jon Altuna Oxan hernaniarrarena. Hortaz, berak ere izango du saria.
Bi irabazleek, abenduaren 17an jasoko dute saria, klubak egun berezia ospatuko baitu Hernanin; laster emango dute ospakizunen berri.
Eta hirugarren batek ere jasoko du oparia, egun horretan: Nagore Aranburu hernaniarrak. Lehiaketako partehartzaile guztien artean, klubeko materiala zozketatu dute, eta berari tokatu zaio.