Garaipen haundia eta garbia lortu zuen Hernanik bigarren kanporaketan, Euskal Herriko Kluben arteko Txapelketa Nazionalean. Hiru partiduak irabazi zizkion Txukun Lakuari, eta dagoeneko final zortzirenetan dago.
Ederki ekin zioten kanporaketari, eta erraz irabazi zion Ioritz Arrietak, lau t’erdikoan, Iribarreni, maila haundiagoa duela erakutsita (18-9).
Markel Lizeagak, ezustekoa
Espero ez zena, Markel Lizeagak buruz burukoan lortu zuen garaipen haundia izan zen (18-9). Espezialitate horretan, pelotari onenetako bat zeukan aurrean, Perez; baina partidu bikaina jokatu zuen hernaniarrak, eta ezustekoa eman zuen. Eta horrekin batera, baita Hernaniren garaipena konfirmatu ere!
Baina albiste pozgarririk izango zen azkeneko partiduan ere, binakakoan: kantxara bueltatu zen Oier Apezetxea, Eneko Aizpitarte lagun, lesio luze baten ondoren. Eta nola bueltatu, gainera! 22-6 irabazi zieten, Uribe eta Ramos gazteei.
Larunbatean, Zazpi Iturriren kontrakoa Zumarragan
Final zortzirenetan, Zazpi Iturri talde amezketarra izango dute aurrean: larunbat honetan, 11:00etan Zumarragan.
Gipuzkoako Trinketekoan, 21 pelotarirekin
Bestalde, asteburu honetan hasi da Gipuzkoako Trinkete Txapelketa, eta Hernani da pelotari gehien dauzkan kluba, 21 guztira: 15 buruz buru, eta beste 6 binaka. Aurreneko jardunaldian, buruz buru aritu dira 13 hernaniar, eta zazpik lortu dute garaipena; besteak beste, Ander Lopez eta Ekaitz Cisneros seniorrek.