Opari bereziak egiteko garaia

Familiako, lagunen arteko, enpresako... otor­duez gain, opariak egin eta jasotzeko garaia ere bada Gabonetakoa. Familiako lagun ezkutuan parte hartu duzu eta betiko izeba edo osabari oparitzea egokitu zaizu? Ez dakizu zer erosi eta ideia berrien bila zabiltza? Ondoren aurkeztuko dizkizuegu horretarako proposamen batzuk, Hernaniko hiru dendarien eskutik: Oihalak dendako Kontxi Arruarte, Urrats Oinetakoak taldeko Pello eta Itxaso, eta Nibiru Edergintza Zentroko Nerea Elizalde.

Baserritar jantziak eta etxeko arropa, Oihalak dendan
Kontxi Arruarteren Oihalak dendan sartu bezain laster nabaria da Gabonetan gaudela: «garai ho­ne­tan baserritar jantziak dira gehien saltzen di­re­nak, dudarik gabe». Gabonetako abestiak nonahi entzun daitezke garai honetan zehar, haur eta helduen ahotsetan, horretarako izaten diren kontzertu, kalejira edo dena delakoan. Eta horrelakoetan ezinbestekoa izaten da baserritar jantzia soinean jartzea. Horregatik hori da Arruartek orain gehien saltzen duena. 
Dena den, dio, «opari bezala ere saltzen dela, izan ere, batzuek ez dute hainbeste diru gastatu nahi izaten». Gainera, «orain aukera pila bat dago», eta beraz, opari polita izan daiteke. Baina, dudarik gabe, «sofako mantak dira gehien saltzen direnak, baita batak eta albor­nozak ere». Manten kasuan, Oihalak dendako arduradunak, opari erraza dela uste du «ta­mainak denentzako balio duelako». 

Mota eta prezio guztietako oinetakoak, Pello eta Itxasoren gomendioei jarraituz
Ohikoa da, baita ere, oinetakoak oparitzea; eta bereziki, Urrats Oinetakoak dendako Pello eta Itxasok azaldu bezala, «etxeko zapatilak, de­por­tibak eta modako oinetakoak dira sal­due­nak». Haurren kasuan ere, «sport estilokoak» oparitzen dira gehien, beraien ustez.
Dena den, «pixka bat denetarik» oparitzen dela azaltzen dute, eta horretarako, beraiek «mota eta estilo guztietako oinetakoak» dituz­tela, bakoitzak berea aukeratu dezan. 
Prezioari dagokionez, Urratseko ar­duradunek onartu dute denetarik daukaten arren, «gama erdi-altuko oinetakoa» dela ge­hi­en­­goa, baina «kalitatea-prezioa harremana ona» dela. 
Horrez gain, bai Pello, baita Itxasok ere nabarmendu nahi dute, seguruenik, «gertu­tasuna» dela beraien bezeroei eskaintzen die­tena: «askok esaten digute: ezagutzen duzu nire gizona, ezta? Zer erosten du normalean? Zer oparitu diezaioket? Orduan, guk gomendioak ematen diz­kie­gu». Eta normalean, beraiek eskainitako hori erosten dute, «guregan jartzen dute konfidantza osoa». Beste batzuk, aldiz, «ideiaren bat ekartzen dute, edota eskaparatean ikusitakoa nahi dute».

Edergintza oparitzeko eskaintza, Nibiru Unisex Edergintza Zentroak
Gero eta gehiago zaintzen dute emakumeek zein gizonek beren estetika eta osasuna, eta horren inguruko opariak egitea ere aukera ona izan daiteke. Hain justu, Hernaniko Nibiru Unisex Edergintza Zentroak eskaintza zabala du alor horretan, bertako Nerea Elizegik azaldu duen bezala: «estetika lortu bai, eta era berean on­gin­tza lantzen dituzten tratamenduak ditugu, baita produktuak ere». Denetarik daukate aukeran: masajeak, tra­ta­mendu korporalak, Indiba, erlajazioa... 
Edergintza oparitzea lehen baino ohikogoa dela onartu du Elizegik; bere ustez horren arra­zoia argia da: «nik uste dut norberarentzat hartzen den denbora bat dela, zaintzeko, mi­matzeko. Batez ere gaur egun, alde batetik bestera, gelditu gabe bizi baikara eta denbora gutxi dedikatzen baitiogu gure buruari».
Gainera, edergintza zentroko arduradunaren iritziaren arabera, «gaur egun denetatik dau­kagu, beraz, horrelako opariekin beti asmatzen da. Jendea gustora etortzen da, orokorrean errepikatzen du; hortaz, emaitza gustatzen zaiolako izango da».