Gure hezkuntza guk erabaki! Zu ere beharrezkoa zara lelopean, deialdi irekia egin zien BagaGiltzak Astigarraga eta Hernaniko irakasle eta hezitzaileei larunbatean. Ehundaka bildu ziren Hernaniko kultur etxearen parean, eta bertan atera zuten argazki erraldoia. Bi herritako irakaslegoaren babesa adierazi nahi izan dute horrela.
Horrez gain, BagaGiltzak agiri bat ere luzatu du, eta irakasle eta hezitzaileak animatu ditu, atxikitzera. Bertan, atxikitutakoek «erabakitzeko eskubidearen aldeko jarrera» agertzen dute, baita «bi herri hauetan egongo den herri galdeketari atxikimendua» eman ere. Gainera, hezkuntzarako ere positiboa dela aldarrikatzen dute, izan ere, «erabaki asko hemendik kanpo hartzen dira eta ezinbestekoa deritzogu hezkuntza sistema propio baten aldeko aldarria egitea. Zergatik? Euskal Herria hizkuntza eta nortasun propioa duen herria delako eta bertako herritarren eta euskararen neurrira eginiko Euskal Curriculuma beharrezkoa ikusten dugulako».
Mahaiak, asteburu honetan
Bestalde, sinadurak biltzen jarraitzen du Astigarragako BagaGiltza plataformak, eta horretarako, asteburu honetan bi txokotan jarriko dituzte mahaiak: larunbatean Ergobiko plazan, 12:00etatik 14:00etara; igandean, aldiz, Santiomendiko Plazetxen izango dira, ordu berean.