Plaza Berri izango da gaur eguerdian, Hernaniko ekitaldien epizentro. Batetik, Gazteen Dantza Txapelketa antolatu du Kriskitiña Dantza Taldeak; eta bestetik Plablo Lasa Artisau Azokako postuak izango dira bertan.
Hamabi bikote, dantzan
Gazteen Dantza Txapelketako 22garren edizioa izango da jokoan, gaurkoan. 12:00etan hasiko da lehia, eta Azkoitia, Azpeitia, Errezil, Villabona, Lezo, Alegi, Lizartza eta Hernaniko dantzariek hartuko dute parte. Bertako ordezkaria Unai Balerdi izango da, eta Villabonako Emeren Irurzun izango du lagun. Fandangoa eta arin-arina dantzatu beharko dituzte 12 bikoteek, eta dantza sueltoan aditua den epaimahaiak aukeratuko du irabazlea. Beñat Luluaga eta Aitzol Txapartegi trikitilariek joko dituzte txapelketa osoko piezak.
Artisau lanak, Pablo Lasaren omenez
Goizeko 10:00etatik postuak jarrita izango dituzte, Pablo Lasaren omenez, artisau azokan parte hartuko duten eskulangileek. Denetatik izango da aukeran, 14:30ak bitartean: egur taila, ehungintza, xaboiak, beira... Hamarretik gora postu izango dira. Eta noski, gazta, opilgintza, taloak... ere, ez dira faltako gaurkoan. Bestalde, bi ekitaldi ere izango dira: 10:30etatik 14:00etara egur taila erakustaldia izango da; eta 11:30etatik 13:30etara, haurrentzako eskulan tailerra.