Entzun duzu Kronikalari bat, euro bat kanpainaz hitz egiten? Urte bukaera aldera, Kronikak kanpaina ezberdinak jarri izan ditu martxan, eta aurten, erronka berri batekin bukatu nahi du 2016a: izenak berak dioen moduan, Kronikalari bakoitzak euro bateko laguntza ematea Kronikari.
Zergatik kanpaina?
2000 urtean sortu zen Hernaniko Kronika. Herriko notizi eta berriak zabaldu ditu Kronikak urte hauetan guztietan, herritarren partehartze zuzenarekin. Abiapuntua Hernani izan bazen ere, Kronikak ibilbide naturala egin du Urumea bailaran zehar, Ereñotzu, Arano, Goizueta eta Astigarragako hainbat puntutara iritsiz. Eta 2014an pausu berria eman, eta Astigarragako eta Urumeako Kronika sortu zituen. Herritarrek egunero, debalde eta euskeraz izan dezakete herriko berri; hori da eta izango da Kronikaren indargunea, beti.
Ibilbide luze honetan, Kronikak laguntzaile asko izan ditu: bazkideak, iragarkiak jartzen dituzten komertzio eta herritarrak, erakundeak, enpresa pribatuak; eta baita ere, kanpaina ezberdietan parte hartu dutenak: San Joanetan txosnan kontsumituz, Gabonetan errifak erosiz... Kronikalari bat, euro bat kanpainarekin, helburu berri bat jarri du Kronikak: kronika irakurri edo erabiltzen duenak, euro bateko aportazioa egitea.
Nondik dator ‘Kronikalari’?
Kronikalari bat, euro bat kanpainarekin, dei zuzena egiten zaio Kronika egunero ateratzeko beharrezkoa den herritar horri. Kronikak beti defendatu izan du, Kronika herritarrekin egiten dela; herritarrak direla edukiak sortzen dituztenak, ekartzen dituztenak eta zabaltzen dituztenak. Kronika, beraien tresna izan da urte hauetan guztietan. Eta hortik dator, hain zuzen, Kronikalari hitza. Kronika egiten duen horri egin nahi zaio deia, kanpaina honekin.
Eltxetxoak, Kronika eskuragarri dagoen puntuetan
Kanpaina gaurtik abenduaren 3ra izango da martxan. Kronikak eltxetxoak banatu zituen atzo Kronika eskuragarri dagoen puntuetan, eta hamabost egunez egongo dira bertan. Kronikaren parte sentitzen den edo izan nahi duen herritarrak, bertan izango du euroa emateko aukera.
Kanpainak iraun bitartean, Kronika hirutan pasako da eltxetxoak pixatzera, eta jarraipena egingo dio egun horietako Kroniketan. Jasotako kiloak zenbat izango ote dira dirutan?
‘Dirutan asmatu, ezetz!’ lehiaketa, kanpaina bukatuta
Hamabost egunak pasata, Kronikak eltxetxo guztiak jasoko ditu. Handik aurrera, astebetean, Dirutan asmatu, ezetz! lehiaketa izango da martxan. Kronikak jasotako diru guztia pixatuko du, eta herritarrek asmatu beharko dute, pixu hori dirutan zenbat den. Irabazleak edo gehien gerturatzen denak, 150 euroko bale bat jasoko du, Urumeako edozein komertzio, jatetxe etab. gastatzeko. Jasotako diru kopuruaren berri abenduaren 10ean emango du Kronikak.