Esperientzia berezia izango da, seguru, euskera hutsez bizitzeko saiakera egitea. Erronka horri heldu zioten, aurreko larunbatean, 500 astigartarrek baino gehiagok, 200 orduko esperientzia pertsonala bizitzeko asmoz. Gaur arte iraungo du 100 da 100... 200 ordu euskaraz egitasmoak; Euskeraren Egunera arte, hain justu.
Ba egitasmoari itxiera eman eta Euskeraren Nazioarteko Eguna ospatzeko, Foru Plazan elkartuko dira astigartarrak, goizeko 11:30etatik aurrera, hainbat ekintzaren bueltan.
Kontatu zure esperientzia!
Herritar askok hartu dute parte egitasmoan; zehazki, 447 hiztun, 47 hizkide eta 19 denda izan dira, izena eman dutenak. Eta 200 ordu horietan bizitako esperientzia, gainontzeko herritarrekin konpartitzea nahi dute. Horretarako, postua jarriko dute Foru Plazan bertan, eta bideoan grabatuko dituzte, parte hartu dutenen esperientziak: pasadizoak, bitxikeriak, ateratako ondorioak... Guztiak animatu dituzte, postura hurbildu eta beraien esperientzia pertsonala kontatzera.
Jolaserako eta ondo pasatzeko tartea ere soberan izango da plazan. Aurrena, zunba saio bat egingo dute, 11:00etan hasi eta 12:00etara arte. Eta ondoren, patinen gainean arituko dira jolasean. Eta nahi duenak, aurpegia margotu eta marrazteko aukera ere izango du!
Haurren bertsoak, azken mezuaren aurretik
Eta ospakizunari bukaera emateko, beste bi ekitaldi izango dira: aurrena, bertso batzuk eskainiko dituzte, Astigarragako Herri Eskolako 6garren mailako ikasleek; eta ondoren, azken mezua irakurriko diete bertaratuei. Horrekin bukatuko dira gaurko ospakizunak; euskerak, ordea, ez dauka epemugarik.
EUSKERAREN EGUNA
GAUR, Foru Plazan
11:00-12:00, Zunba saioa.
12:00-13:30, 100 da 100... 200 ordu euskaraz standa: izandako esperientziak bideoan grabatuko dira: pasadizoak, bitxikeriak, ateratako ondorioak... Hurbildu eta kontatu zure esperientzia!
12:00-13:30, Jolasak patinen gainean.
12:00, Aurpegia margotzeko eta marrazteko aukera haurrentzat.
13:30, Ikastolako 6garren mailako ikasleak bertsotan.
13:40, Azken mezua.
Udal Gobernuaren oharra
«Zorionak, partehartzaile guztioi!»
Euskararen Nazioarteko Eguna dela aprobetxatuz, Udal Gobernuak zoriondu nahi izan ditu 100 da 100... 200 ordu euskaraz egitasmoan parte hartu duten guztiak, eta baita aurretik hori lantzen lagundu duten elkarte eta bizilagunak ere: «euskera bultzatzea da, hain zuzen ere, EAJren gobernuaren premisa garrantzitsuenetarikoa. Eta gainera, horrelako ekimenak ezinbestekoak dira, gure herrian bizikidetza sustatzeko. Oso lagungarriak dira, herritarren arteko harreman sozial berriak sortu eta aurretik zeudenak indartzeko», azaldu dute.
Eta eskerrak eman nahi izan dizkiote, EH Bilduri ere: «bereziki eskertu nahi diogu EH Bilduri, Astigarragan euskeraren sustapenean egin duen eta egiten duen lana, eta ildo horretan, 100 da 100... 200 ordu euskaraz bezalako egitasmoak martxan jartzea ahalbidetzea. EAJk betidanik adierazi du, beste alderdiekin elkarlanean aritzeko borondatea, eta horregatik, bereziki pozten gaitu, euskeraren inguruan lan egiteko, gure ezberdintasunak alde batera uzteko gai izanak».
Eta gonbidatu dituzte herritar guztiak, gaur egingo diren ekintzetan parte hartzera.