LUIS Intxauspe alkatea eta Igor Jose ELAko ordezkaria atzo bildu ziren, Hernaniko Institutuaren eraikuntza berrian lanean ari diren langileen egoerari buruz hitz egiteko. Kronikara bidalitako prentsa oharrean azaldu dutenez, langileek bizi duten egoera txarra azaldu zion ELAko ordezkariak Alkateari: «langileen egoera txarraren inguruan aritu dira. Langileen lan baldintzak eta segurtasun neurriak ez direla aplikatzen jakinarazi dio Alkateari».
Oharrean gogoratu dute, Hernaniko BHI ikastetxeko obra Eusko Jaurlaritzak esleitu duela: «ELAk jakinarazi duenez, Vias y Construcciones SA enpresari esleitu dio 2,8 milioi euroren truke, hasierako aurrekontuaren azpitik. ELAk salatu du, enpresa honek ez duela eraikuntza arloko Gipuzkoako hitzarmena aplikatzen».
«Erakundeen ardura da lan hitzarmenak aplikatzen direla egiaztatzea»
Hernaniko Udalak prentsa oharrean azaldu duenez, erakundeen ardura da kontratazio publikoetan esleitutako enpresetan, Gipuzkoako lan hitzarmenak aplikatzen direla egiaztatzea: «hori dela eta, obra horren jarraipena egingo dugu eta harremanetan jarriko gara Eusko Jaurlaritzarekin eta esleipena izan duen enpresarekin».