Euskal Herriko Unibertsitatean lana egiten duten hainbat hernaniarrek agerraldia egin zuten joan den astean, BagaGiltza ekimenarekinn bat egiteko. Adierazpen bateratua egin zuten agerraldian, BagaGiltza ekimenak martxoaren 19rako deitua duen herri galdeketan parte hartzeko deia egiteko asmoz.
Hainbat helburu
Adierazpenean azaldu dute EHUn egiten dutela lan, eta bertako estatutuen arabera, unibertsitateak hainbat helburu dituela: «bizitza politiko, kultural eta sozialean hobeto parte hartzeko baldintzak sortzea, batetik. Elkarbizitza demokratikoa eta euskal gizartearen garapen jasangarri eta bidezkoa sustatzeko konpromisoa dugu bestetik. Aitzindari intelektual eta etikoa izateko bokazioa dugu, zientziaren espiritu kritikoa eta aniztasun ideologikoaren errespetua erabiliz. Oinarrizko eskubide eta askatasunak praktikan jarri nahi ditugu, eta baita ere printzipio eta balio demokratikoen errespetua ere».
Adierazpenean diote, unibertsitateak beti izan duela autonomo eta burujabe izateko bokazioa: «eztabaida, deliberazioa eta bozketa dira ohiko tresnak bere eguneroko jardueran, batez ere publikoa den unibertsitate batean. Eta hori da, esparru publikora, hitzaren gunera, eraman nahi dugun Unibertsitatearen izaera». Azaldu dute, testuinguru horretan, kontsulta egitea eta erabakia hartzea ahalduntze ariketa bat dela: «gu kolektibo gisa indartzeko modu bat da, gure etorkizunaren jabe izan nahi dugula esateko modu bat da. Gure erabakien, hezkuntzaren eta zientzia sistemaren jabe izan nahi dugulako»
Hori horrela, azaldu dute, Hernaniko EHUko hainbat langilek bat egin dutela BagaGiltza herri ekimenak Hernanin 2017ko martxoaren 19rako deitua duen herri galdeketarekin: «dei egiten diegu hernaniarrei, egingo den herri galdeketan parte hartu dezaten».