Azaroaren 25aren bueltan hainbat ekitaldi ari dira izaten herrian, eta horietako bat da gaur antolatu dutena. Dokumental-solasaldia izango da: Ozpinaren sindromea. Dokumentala Biterin proiektatuko dute 19:00etan hasita; eta ondoren solasaldia antolatu dute Rosalina Tuyucekin, Guatemalako emakume alargunen koordinadora nazionaleko presidentearekin.
20 urte, Guatemalako bake akordiotik
20 urte pasa dira Guatemalako bake akordioa sinatu zutenetik, bertako emakumeek ordea, borrokan jarraitzen dute. Ozpinaren sindromea dokumentalean kontatzen da, emakume antolatuek bakearen bila egiten duten lana: «gorrotoa lausotu dadin, eta minak adiskidetu gaitzan. Justizia, egia eta kalteordaina; badagoela itzala gainditu dezakeen borrokarik. Ozpinaren sindromearen aurka borrokan dabiltzan gizakien inguruko filma da». Dokumentala bukatzean, Rosalina Tuyucek kontatuko du Guatemalan bizitutakoak utzi dien esperientzia; eta Euskadin herritarrek aurrera daramakiten bake prozesuaz ere ariko da. Galderak egiteko aukera ere izango dute bertaratutakoek.