Hernani Errotzen taldeak antolatuta, Joseba Larretxe komikilaria izango da gaur Biterin arratsaldeko 19:30etatik aurrera. Eneko Aritza, lehen errege baskoia liburuaz ariko da Larretxe, Nabarraldek komiki gisa argitaratu duena.
Joseba Larretxe berak egin du komikia, eta Angel Rekalderena da, ordea, gidoia.
Horrela bada, komikilaria den heinean, berak azalduko du nola kontatu daitekeen historia komiki baten bitartez.
Dokumentazio gutxi
Nabarraldek argitaratutako elkarrizketa batean, Joseba Larretxeren iritziz, «komikia tresna oso baliagarria da gure historia jendeari ezagutzera emateko». Baina onartzen du kasu honetan ez dela erraza izan, informazio gutxi dagoelako: «ez dago garai horretako dokumentazio askorik jantzien eta armarrien inguruan, adibidez. Kota-sareak erabiltzen zituztela bai, eta gaztelarren ezkutuen zehaztasun gehiago daude. Irudimenetik ere tira egin dut pertsonaiak eta jantziak sortzeko, hartara. Hori bai, historiara ahal bezainbat hurbilduz».